Хайрын төлөөх сүүлчийн тэмцэл

Арвантавдугаар бүлэг

Таны машины ард нэг даавуу бололтой зүйл наалттай байх чинь гэж хамгийн арын машины эзэнд нэгэн хамгаалагч мэдээ дуулгав. Жолооч нь сандран очиж үзээд "Дэлбэлэгч -1"-ийн сануулга байна хэмээн сандарсан дуугаар хашгирах нь тэр. Саяхан ирсэн шороон замаас болсон бололтой сул шороонд үл мэдэг дарагдсан хэдий ч булангийн алтан соёмбо нь гялалзсан өнгөө хадгалсан хэвээр байх ажээ. Сануулга дээр “"Дэлбэлэгч -1"-ийн гишүүдийг хууль бусаар дарамтлах гэж оролдсон хүн бүрийн, оролцсон хүн бүрийн орон сууц болон зуслангийн байшин, автомашинууд энэ жилдээ багтан бүгд дэлбэрэх болно гэдгийн хатуу сануулж байна” хэмээн бичсэн байх нь тэр.

Үүнийг уншиж дуусаад бүх хүний царай өөрийн эрхгүй хувьсхийлээ. Сануулгыг хүүхдийн тоглодог наалддаг сумтай буугаар хойноос нь буудаж тогтоосон бололтой, цавуулаг наалттай бөөрөнхий резинтэй суманд сайтар бөхлөн наасан байжээ.

Хэдийгээр ихэнх нь баривчлагдсан гэж цагдаагийнхан мэдэгдсэн ч гэлээ тусгай ажиллагаа явуулаад ч гэсэн бүгдийг нь баривчилж чадаагүй гэдгийг тэд мэдэхийн сайнаар мэдэж байв. Тэр тусмаа зохион байгуулагч гол хүн нь усанд хаясан чулу мэт ор сураггүй алга болсныг ч сайн мэдэж байв. Тэрээр үлдсэн хүмүүс дээрээ дахин өөр хүмүүс нэмж элсүүлсэн шиг явж байвал яах билээ. Бүх хөрөнгөө дэлбэлүүлэхгүй гээд идээшиж дассан, сэтгэлдээ тааруулан засаж тохижуулсан байраасаа гарч, бүгдийг нь баригдах хүртэл байнга байр хөлсөлж амьдрах уу гэсэн бодол ихэнх хүний нүүрэн дээр илэрч байсан ч олуулаа зэрэг сүрийг үзүүлэн ирсэндээ санаа зовон гаднаа үл тоосон дүр үзүүлэн ганц худгийн уулзалтын бачуухан өрөөнд шахалдан орж даргыг нь дуудахыг шаардав. Гэхдээ сануулгыг уншсан болохоор хэн хэнийнх нь сэтгэл эвгүйрхэж байгаа нь илт байлаа.

Харуул хамгаалалт тэдний бодож байснаас ч илүү их байх бөгөөд нилээд хүмүүсийг үргэлжлүүлэн байцааж байгаа хэмээн харуул тэдэнд сэмээрхэн хэл дуулгалаа. "Дэлбэлэгч -1"-ийн бүх гишүүдийг илрүүлэн баривчлаж дуусах хүртэл хэнийг ч хэнтэй ч уулзуулахгүй бөгөөд тусгай эрх олгосон шуурхай группын гишүүд, томилогдсон мөрдөн байцаагчдаас өөр хэний ч одоогоор уулзуулахгүй байх хатуу тушаалтай хэмээн "Дэлбэлэгч -1"-ийн хэнтэй нь ч уулзуулсангүй. Зарим нь хэдэн тийшээ утас цохин танил нөхөдрүүгээ бүдүүн дуугаар ярьсан хэдий ч яах ч аргагүй хэмээх хариулт ээлж дараалан  сонсож байлаа. Ийнхүү тэслэгчийн мэргэжил бүхий голлох хэдэн нөхдийг нэвширтэл нь жанчиж хорслоо тайлах хүсэл өвөртөлсөн эрхмүүд хүчээр дайран орж чадахгүй болохоор аргагүйн эрхэнд буцах нь тэр.

Гэхдээ түрүүний ирсэн сануулгыг мартаагүй байгаа болохоор наашаа харж уурлацгаасан ч, цаашаа ханцуйн дотроо юутай ч орон гэр бүтэн үлдлээ хэмээн залбирчээ. Магадгүй сануулга ирсний улмаас заавал тэдгээр нөхдүүдийг гаргуулан уулзах гэж хүч тавиагүй ч байж болох талтай байлаа. Харин шинэхэн сануулгын талаар хэн хэн нь цагдаад мэдэгдэхгүй байхаар тохиролцов. Ихэнх нь "Дэлбэлэгч -1" бүрэн баривчлагдаж дуустал хууль бусаар тэдэнтэй орооцолдон хонзогнохгүй байхаар шийджээ. Тэртээ тэргүй зохион байгуулалттай тусгай групп тун удахгүй учрыг нь олохдоо л олно.

Ийнхүү сануулга хэвлэх, тараах ажлын бүлгийнхэн цөөхүүлээ үлдсэн ч гэлээ баривчлагдах аюулыг үл хайхран сануулга илгээсний ачаар "Дэлбэлэгч -1" –ийн гишүүд хууль бусаар гэсгээгдэн шийтгэгдэхээс нэгэнтээ аврагджээ. Гэхдээ хэдийгээр хүмүүс урдны адил айн ширвээтэж байгаа ч гэсэн үлдсэн гишүүд мэдээлэл цуглуулан, сануулга илгээхээс өөрөөр юу ч хийж чадахгүй гэдгээ мэдэхийн цаагуур мэдэж байлаа. Гэхдээ ахлагч нь дахин нилээдгүй тэсрэх бөмбөг хийж хүрэхээр тэсрэх бодис, хэрэглэл бийг мэдсээр байсан ч одоо хэн тэднийг угсарч, хэн байрлуулах билээ.

Үлдсэн цөөхөн хэдэн хүн анхаарал болгоомжтой байж баривчлагдахгүй үлдэх л чухал байв. Хэдийгээр байдал ингэж буруугаар эргэсэн ч гэлээ хэн ч туйлгүй ихээр санаа зовсонгүй. Учир нь анх нэгдэхдээ энэ бүх эрсдлийг урдчилан тооцсон байсан бөгөөд бүх хүн мэдсэн хирнээ хамтрахаар сэтгэл шулуудсан билээ. Энэ бүх хүн насаараа зүтгээд ч олохгүй тусламжаа нэгэнт авчихсан байсан болохоор харамсах зүйл цөөхөн байв. Бүгд нийгэмд цочроо өгч, хуулийг уландаа гишгэсэн эрхмүүдэд томхон сургамж хайрласан "Дэлбэлэгч -1"-ийн гишүүн болсноороо бахархаж байх үед нийгэм тэднийг арай өөрөөр хүлээн авч эхэллээ.

Маргааш нь талбай дээр сайн дураараа тавь орчим хүмүүс цуглан, дуугүй жагсаал хийхээр завджээ.