Хайрын төлөөх сүүлчийн тэмцэл

Арванхоёрдугаар бүлэг

Оройн есөн цаг гэхэд хөлсөө асгартал ажилласан мэргэжилтнүүд тэсрэх бөмбөгийг сая нэг аюулгүй болгож чаджээ.Гэртээ байсан бүх хүмүүс шуурхай сурвалжлагыг хүлээн авч үзэхэд барилгын эзэн магнайгаа хагартал баярлан маасайн байж ярилцлага өгч байв.  Тэрээр одоо "Дэлбэлэгч-1"-ээс айх зүйл байхгүй гэж ам бардам хэлж байлаа. Есөн цаг гучин минутад тусгай мэргэжилтнүүдийн баг гадны хүнгүйгээр хорь орчим минут зөвлөлдөхийг хүсчээ. Тэд яг есөн цаг гучин минутад зөвлөгөөний өрөөнөөс гарч ирэв. Түрүүний баатруудад тооцогдоод байсан төрх байдал нь арчигдан үгүй болсон нь хэн бүхэнд илт байв. Ахлах мэргэжилтэн түүнийг тойрон зогсох цагдаагийнхан болон барилгын эзнийг нэгэнтээ тойруулан хараад урт амьсгаа аваад барилга дэлбэрнэ гэх нь тэр.

Үүнийг сонссон хүмүүсийн царай бүгд хувхайн цайж, барилгын эзэн залуу гаслах мэт авиа гаргаад ойролцоох сандал дээр тэрийн сууж үсээ арзайтал нь базалж эхлэв. Ахлах мэргэжилтэн тайлбараа бүгдэд ойлгогдохоор хэллээ. Аюулгүй болгож чадсан энэхүү тэслэх бөмбөгийн хүчин чадал нь барилгын хэсгийг нь л нураах хүчин чадалтай болохыг бид олж тогтоолоо. Одоо дахин өөр нэг буюу хэд хэдэн тэсрэх бөмбөг барилга дотор байрлаж байгаагаас гарцаагүй. Өнөөдөр бид өөрсдийн хамгийн дээд хүчин чадал, боломж бололцоогоороо ажиллаа. Гэхдээ одоо дараагийн тэсрэх бөмбөгийг олж илрүүлсэн ч гэлээ аюулгүй болгож, барилгаас салгаж авч амжихгүй болов уу. Гэсэн ч бид сануулгад дурдсан цаг буюу шөнийн нэг цаг хүртэл тасралтгүй ажилласаар байх болно. Харин урдчилан сэргийлэх арга хэмжээг одооноос эхлэн авч, барилгын эргэн тойронд байх харуул хамгаалалтын аюулгүй байдалд анхаарал тавихыг хүсч үгээ дуусгалаа.

Мэргэжилтнүүд дахин ажилдаа орлоо. Тун удахгүй сануулгад заасан хугацаа ойртож байгаа ч гэсэн тэд бууж өгөлгүй ажлаа дахин эхэлжээ. Харин тусгай группынхан байцалтынхаа арга хэлбэрийг чангаруулж эхэлжээ. Тэднийг өнөөдөр дэлбэлэхээр зэхсэн барилга дахь тэслэх бөмбөгийн тухай бүх мэдээллийг нуун дарагдуулалгүй үнэнээр нь мэдүүлэхийг шаардсан ч бүгд хэлэлцсэн мэт огт мэдэгүй, сураг ч дуулаагүй хэмээн тас мэлзсэн хэвээр. Баривчилгаа дахин үргэлжилж тэдний ар гэрийнхэн, гэр бүлээс нь сэжигтнээр татан байцаахаар шийдэв. Сэтгэлзүйн хүнд дайралтуудыг байцаалтын явцад ашиглах шийдвэр гарчээ.

Дөрвөн сартай хөхүүл хүүхэдтэй эхнэрээ ганц худгийн гэрэлгүй, өмхий өрөөнд хоригдож байгааг харсан залуу тэсгэл алдан анхны мэдүүлгийг өгч орхижээ. Энэ үед цаг шөнийн арван нэгэн цаг есөн минут болж байв. Мэдүүлгийг эхлэсэн дор нь тэр дор нь тушаал гарган мэргэжилтнүүдийн багийн эрлийг зогсоох шийдвэрийг гаргав. Мөнөөх залуу тэсрэх бөмбөгийг хүлээн авч суурилуулдаг гол дөрвөн хүний нэг байсан бөгөөд барилгад дахин хоёр бөмбөгийг суурилуулсны нэгийг нь баригдаж байсан хананы дунд нь байрлуулсан болохоо хүлээжээ. Ханын хэсгийг эмтлэн авч, бөмбөгийг байрлуулаад гадуур нь цемент цутган хатаасан тул түүнийг илрүүлсэн байлаа ч гэсэн аюулгүй болгохоосоо нэгэнт өнгөрсөн гэж мэдүүлжээ. Ханыг яаж ч ховхлох гэж оролдсон бай барьцалдан хатсан нэг л утсыг хөндөх юм бол хүнтэйгээ хамт тэсрэх болно.

Мэдүүлэг шөнөжин үргэлжиллээ. Хэргээ хүлээсэн залуугаас авсан мэдүүлгээр бусдыг нь хөөн байцаахад хавьгүй хялбар болж эхэлж байв. Хэргийн гол нь хэн тэднийг санхүүжүүлж, их хэмжээний тэсрэх бодисыг оруулж ирсэн гэдэг хамгийн ихээр сонирхол татаж байв.

Тэнгэр баганадах мэт тоос тоосонцор үүсэн, чих дүлийрэм дуу гаргаж хүүхдийн тоглоомын талбай эзэлсэн шинэхэн барилга сууриараа нуранги болон хувирч, "Дэлбэлэгч -1" хэлсэн цагтаа мөнөөх барилгыг хумхийн тоос болгон хувиргав. Бүрэн баригдаж дуусаагүй болохоор хохирол бага амссан захирал чадуулсан уур хорсолдоо багтран шахан, баригдсан хэдийг бүгдийг нь шоронд нь цааш нь харуулахаар ам өгч байлаа. Харин цагдаагийнхан дараагийн хэрэг гарахгүй гэдэгт итгэлтэй байв.

Тусгай группын байцаалт, мөрдлөгөөр дараах зүйлс ил болох нь тэр.