Хайрын төлөөх сүүлчийн тэмцэл

Есдүгээр бүлэг

Маргааш өглөөг хүлээлгүйгээр олон нийтийг хамарсан үймээн самуун дэгдээсэн мэдэгдлийг цагдаагийн байгууллагын зөвшөөрөлгүйгээр нийтэд тараасан хэмээн буруутгаж телевизүүдийг түр хугацаагаар хаах шийдвэр гаргасан хэдий ч хоёр ч газар нь мэдээний редактороо дур мэдэн нийтэд цацсан гэж ажлаас чөлөөлсний үндсэн дээр хэвийн ажиллаж байлаа. Харин цаанаа хэрэг явдал нэг тийш эргэхээр буцаан ажилд нь авах нууцхан гэрээтэй байв. Юутай ч тэр нар одоо өөрийн өмч хөрөнгөө бүрэн бүтэн үлдээсэндээ нууцхан баярлацгаах аж.

Шууд нэвтрүүлгийг үзсэн бүх хүмүүс хоёр хэсэгт хуваагдаж байлаа. Тэн хагас нь "Дэлбэлэгч-1" -ийг үзэн ядаж байхад, үлдсэн хүмүүс болох эрсдэлгүй газарт байрлах байрны оршин суугчид баяр хөөр болон хүлээж авч байв. Тэр бүү хэл саяхан хүүхдийн тоглоомын талбайгаа булаалгасан нэгэн байрны оршин суугч талбайг тойруулан хашсан хашааны гадна "Дэлбэлэгч-1" мандтугай гэж мурий сарий бичсэн цаасыг бахдалтайгаар скочдон нааж байгаа харагдана.Ажил гэр, автобус унаанд гээд ер нь хүн бүхэн л ам амандаа "Дэлбэлэгч-1" -ийн тухай ярих бөгөөд хоорондоо санал зөрөлдөж, тэр бүү хэл нэг нь эрсдэлтэй, нөгөө нь энгийн байранд амьдардаг хоёр сайн найз хүртэл хоорондоо муудаад авчээ. "Дэлбэлэгч-1" яг л улс төр шиг хүмүүсийг хагаралдуулж эхэлжээ.

Харин дөрөв дэх өдрийн шуурхай зар сонин дээрээс хүмүүс анх удаа итгэмээргүй зүйл олж харлаа. Анх удаагаа байрны үнэ нэг зэрэг хоёр янзаар хэлбэлзсэн байх нь тэр. Нэг хэсэг байр гурваас ес хүртлэх сая төгрөгөөр нэмэгдсэн байхад нэг хэсэг байрны үнэ бараг тавь түүнээс доош хувиар буусан байв. Анх удаа гурван өрөө шинэхэн байр 17 сая болж, нэг өрөө байр 9 сая болсон байв. Гайхалтай хямдарсан эдгээр байрнууд бүгд "Дэлбэлэгч-1"-ийн сануулгад багтсан эрсдэлтэй хэмээн зарласан байранд багтсан ажээ.

Харин дараагийн зарын сонин дээрээс улам сонирхолтой зүйлийг олж харж эхлэв. Шинэхэн баригдсан офисууд байрны түрээсийн төлбөрүүд багасаж, нэг газар бүр түрээсээ хоногоор тооцон сар тутамд тооцоо хийж байхаа зарласан байх ажээ. Харин долоо хоногийн сүүлээр бүр ч хачирхалтай зар сонин, телевизүүдээр гарч эхлэв. "Дэлбэлэгч-1"-тэй найдвартай уулзуулах буюу холбоо бариулсан хүнд өндөр шагнал амласан байх ажээ. Тэд "Дэлбэлэгч-1"-ийг ийнхүү хайж эхлэсэн байлаа.

Гэхдээ хүмүүс газрын алба дээр болж буй бусад үйл явдлыг мэдсэн бол илүү ихээр сонирхох байсан бизээ. Тэнд ... болж байлаа...Зарим нь ашиглагдаагүй байгаа газрынхаа лицензийг буцааж, хэдэн мянга дахин илүү төлсөн нууц төлбөрөө буцаан авахаар хэдэн жил дамнан найзалсан эрхтэн дархтантай эгээ л чи би дээрээ тулан маргалдаж байгаа ч, гадна хаалганы цаана анир чимээгүй байх аж. Гэхдээ цаанаа нэг муу ёрыг урин дуудсан анир чимээгүй байдал хүмүүсийн яаран сандран алхлах чимээнд даанч нэг дарагдсангүй.

Харин цагдаагийнхан гар хумхин зүгээр суусангүй. Тэслэгчийн мэргэжлээр ажилладаг хүмүүсийг компаниудаар нь нарийвчлан, эрчимтэй шүүж шалгаж байв. Олон нийтээс ч бас чамгүй нуун дарагдуулж байсны ачаар сэжигтэй гэхээр 11 хүний нэрсийг олжээ. Эдгээр хүмүүс бараг нэгэн зэрэг энд тэндхийн компаниудаас 3 сар орчмын өмнө үүрэгт ажлаасаа саналаараа халагдсаныг олж тогтоолоо.

Эдгээр хүмүүсийн ар гэрийг нь нягтлан судалж, яг одоо хаана юу хийж байгаа талаар хүн нэг бүрд хэд хэдэн тандуул бүхий баг гарган тусгай даалгавар өгсөн байна. Тэд нарийн хянан шалгаж "Дэлбэлэгч-1"-тэй холбогдох нарийн сэжмийг хайх болно.

Харин энэ үед "Дэлбэлэгч-1"-тэй холбогдохыг хүссэн зарууд ар араасаа хөвөрсөөр л. Барилгын тэр компанийн гүйцэтгэх удирдлага "Дэлбэлэгч-1"-тэй холбоо барихыг хүсч байгаа тул, найдвартай хүн холбоо тогтоож туслана уу. Шагналын сан хорин сая, нууцын найдвартай хадгална. Барилгын тэр компанийн гүйцэтгэх удирдлага "Дэлбэлэгч-1"-тэй холбоо барихыг хүсч байгаа тул та бүхэн манай компанитай заавал холбогдохыг хичээнгүйлэн хүсч байна. Нууцлалыг дээд зэргээр хадгалах баталгааг өгнө....

Цагдаагийнхан эдгээр заруудыг хориглож дийлэлгүй шүд зуун занах аж. Тэд өөрийн илрүүлэх гол сэжмээ хүлээн цаг хугацааг ажралгүй ээлжгүй ажиллаж байлаа.