Хайрын төлөөх сүүлчийн тэмцэл

Наймдугаар бүлэг

Цаанаасаа хэлэлцэн тохиролцоогүй байсан ч гэсэн телевизүүд бүгд эрэгтэй хөтлөгчтэй байсан юм. Ингээд бүхнийг цочирдуулсан мэдээ дамжууллаа.

Эрхэм хүндэт үзэгчдээ шуурхай мэдээнд анхаарлаа хандуулна уу. Бид бүхэн шуугиан тариад байгаа "Дэлбэлэгч-1"-ийн тухай мэдээллийг та бүхэн хүргэж байна. Өнөөдөр энэхүү бичлэгийг манай телевизийн байранд нэгэн үл таних этгээд авчран өгсөн бөгөөд үзэгч та бүхэндээ нэмэлт тайлбар хийлгүй бичлэгийг тэр чигээр нь үзүүлж байна.

Жижгэвтэр хэдий ч саруулхан өрөөний хойморт саарал даавуун дэвсгэр дээр гялалзсан алтан соёмбо байрлах агаад хүрэн модон жаазанд хийж хананд өлгөсөн байх ажээ. Түүний доохно талд багшийн ширээ гэхээн нэгэн ширээн дээр нүүрийг нь санаатай бүрэлзүүлсэн нэгэн дунд насны болов уу гэмээр залуу сууж байх бөгөөд хажуудаа монгол улсын жижигхэн далбаа тавьсан байв. Хоймор дахь ширээнээс нааш хана дагуулан өөд өөдөөс нь харуулан тавьсан сандлууд дээр дан цагаан өнгийн хувцас өмссөн нийтдээ гуч орчим хүмүүс сууцгаах нь "Дэлбэлэгч-1"-ийг тийм ч цөөхүүлээ биш гэдгийг нийтэд нотлохыг хүсэх мэт. Тэд бүгд хар нүдний шил зүүж, өргөн саравчтай цагаан малгай өмсөөд сандал дээр эгнэн суух тул хэн болохыг нь тодорхой ялган харах боломжгүй байлаа. Ширээнд суусан залуу босч гартаа барьсан саарал даавуугаа дээш өргөн яриагаа эхлэх нь тэр. Эрхэм хүндэт үзэгчидээ та бүхэн товхгор алтан соёмбыг хараад таниж байгаа байх гэж найдая. Тиймээ бид "Дэлбэлэгч-1" байна.

Нийгэм даяар сөрөг уур амьсгал үүсч "Дэлбэлэгч-1"-ийг бүх хэрэгт буруутгаж, басхүү үл мэдэгдэх түгшүүрээс айн ширвээтэж эхэлсэн учраас "Дэлбэлэгч-1" өөрийн үйл хэргээ нийтэд танилцуулах хэрэг урган гарлаа.

1. Бидний хамгийн эхний зорилго бол "Дэлбэлэх" билээ. Энэ зорилгодоо маш нарийн төлөвлөгөөтэйгээр бэлтгэн, тавьсан зорилт бүрдээ ямар ч үнээр хамаагүй хүрэх учраас та бүхэн сануулга өгсөн байшин барилгад заасан хугацаанд байх юм бол үзэх мөргүй хумхийн тоос болон хувирна гэдгийг хатуу сануулж байна. Тиймээс эр зориг биш муйхар ааш авир гаргалгүй сануулгад өртсөн байшинг нэн даруй орхин явах хэрэгтэй гэж гэдгийн дахин мэдэгдэе.

2. Хүний амь нас хохироох нь бидний баримталж байгаа үзэлд нийцэхгүй учраас урдчилан сэрэмжлүүлэх арга хэмжээг авч сануулгыг өөр газарт шилжин нүүх шаардлагатай хугацааг олгосны үндсэн дээр өгч байгаа билээ. Та бүхэн нүүхгүй үлдвэл эд хөрөнгө амь насаараа дахин хохирох болно шүү. Учир нь бид ямарваа нэгэн байрыг дотор нь нялх хүүхэд түгжээтэй байгаа гэсэн үндэслэлээр заасан хугацаандаа дэлбэлэхгүй орхих юм бол дараа дараагийн байрууд бидний сануулгыг үл тоох нь гарцаагүй. Энэ бүхнээс сэргийлэн бид сануулга өгсөн байр бүрийг дотор нь хэн байгааг үл харгалзан заасан цагтаа саадгүй дэлбэлэх болно. Та бүхэн амь насаа хамгаалах эсэхээ өөрснөө шийдэцгээ. Бид дөрөв дэх барилгаа саадгүй нураасан бөгөөд цаашдаа ч товлосон бүх байраа саадгүй нураах болно.

3. Бид дэлбэлсэн орон байрны эздэд өчүүхэн төдий ч туслахгүй. Туслахын тулд дэлбэлэхгүй шүү дээ. Харин бидний энэхүү үйлдлийн улмаас бүсад байрны иргэдэд хор хохирол учирвал шийдвэрлэлцэж өгөх болно.

4. Ямар байрыг дэлбэлэх вэ гэсэн асуудал бидэнд маш тодорхой байдаг. Таны амьдран суугаа байр дэлбэрэлтэд өртөх үү, эсвэл та санаа зовохгүй энгийн амьдралаар амьдрах уу гэдэг асуултанд бид биш та өөрөө хариулж чадна. Та нар бүгд Газрын тухай хууль олж унш. Тэндээс аюулгүй, санаа амар амьдрах эсэх чинь бэлэн бичээстэй байгаа. Дараах байруудад аюул нүүрлэх болно гэж урьдчилан сануулъя.

Дархан цаазтай газар баригдсан барилга

Голын ай сав газрын дэргэд хуульд заасан хэмжээнээс дотогш баригдсан бүх барилга

Хотын цэвэр усны гол шугам дээр баригдсан баригдаж буй барилгууд

Хот төлөвлөлтийн дагуу хуучин баригдсан барилгуудыг шахан нарны гэрлийг хаан сүүдэрлэж, хоёр барилгын хооронд байх ёстой хуулиар заасан зайнаас дотогш газар барьсан бүх барилгууд

Хүүхдийн тоглоомын талбай, цэцэрлэгт хүрээлэнгийн зай талбайг эзлэн барьсан барилгууд

Хотын ерөнхий хөгжилд тусгагдаагүй, нийтийн эдэлбэр газарт зөвшөөрөлгүй баригдсан барилгууд

Нийтийн эзэмшил газарт хамаарагдах ойн санд байрлан ой модыг их хэмжээгээр нь хашаагаар хүрээлэн авч, нэг өрхөд оногдох газрын хэмжээнээс илүү их газрыг хувьдаа өмчлөсөн бүх барилгуудыг эхний ээлжинд нэг бүрчлэн дэлбэлэх болно.

Энэхүү зорилго маань хэдий хэрийн хугацаа зарцуулаглан байж биелэхийг одоогоор хэлж мэдэхгүй ч "Дэлбэлэгч-1" өөрийн зорилгоо алхам алхмаар биелүүлсээр байх болно гэдгийг хатуу амлая.

Та нар дээрх хууль зөрчин баригдсан байранд ажиллаж, түрээслэж эсвэл амьдарч байгаа бол таны ээлж тун удахгүй ирэх болно. "Дэлбэлэгч-1"  орон гэр, эд хөрөнгөө алдаж байгаа хүмүүст уучлал гуйхгүй, санаа зовнихгүй байна. Учир нь худалдан авагч байхгүй бол хүүхдийн тоглоомын талбайг чинь булаахгүй, танай гэрийн дэргэд өндөр байшин сүндэрлүүлж тас харанхуйд умбуулахгүй байх байсан. Жирийн иргэд хөл тавих боломж олгодоггүй газар, хэн нэгэн машины дугуйгаар тал хөндийг сэглэн хувийн барилга дур мэдэн барихгүй байх байсан.

"Дэлбэлэгч-1" үйл ажиллагаагаа албан ёсоор эхлэж байна. Тун удахгүй дараа дараагийн барилгууд бүгд агаарт хийсэн одох болно. Амиа аврах эсэх нь иргэн таны өөрийн чинь сонголт.

Бичлэг ийнхүү тасарч, дэлгэц тас харанхуй болжээ.